اقتدار کی کشمکش اور فلسطینیوں کی مسلسل آزمائش

اسرائیل کے بارے میں بدلتی ہوئی عالمی رائے

بورڈ آف پیس کی تشکیل اور جنگ بندی کے باوجود فلسطینی امن و راحت سے محروم ہیں۔ الجزیرہ کی ایک رپورٹ کے مطابق اس سال اکتوبر تک 254 بچوں سمیت 1,219 فلسطینی اسرائیلی بمباری، ڈرون حملوں، فائرنگ اور قبضہ گردوں کی یلغار میں جاں بحق ہوئے۔ ان میں 113 غربِ اردن اور باقی غزہ میں جان سے گئے۔ اس دوران مجموعی طور پر 13,777 فلسطینی شدید زخمی ہوئے، سال کے پہلے دس مہینوں میں گرفتار کئےجانے والے فلسطینیوں کی تعداد 26,500 رہی۔

عرب ووٹروں کے خلاف انتہا پسندوں کا ردعمل

حالیہ انتخابات میں عرب جماعتوں کی بہتر کارکردگی نے فلسطینیوں کے لئے آزمائش کے نئے دروازے کھول دیے۔ آتھ نومبر کو لُد (Lod) شہر کے عرب محلے پر اسرائیلی انتہا پسندوں نے حملہ کیا، جس میں کئی افراد زخمی ہوئے۔ حملہ آور ’’رعم کو ووٹ دینے والو! عرب دیس چلے جاؤ‘‘ کے نعرے لگا رہے تھے۔ پولیس نے بروقت کارروائی کرتے ہوئے 11 مبینہ حملہ آوروں کو گرفتار کر لیا۔

انتخابی دھاندلی کا الزام اور صدر کی تضحیک

انتخابات میں ہارنے والوں کا رونا دھونا معمول ہے۔ عام طور پر دھاندلی کی شکایت حزبِ اختلاف کو ہوتی ہے، لیکن اسرائیل میں حکومت انتخابی دھاندلی اور بدعنوانی کا شکوہ کر رہی ہے۔ اسرائیلی اٹارنی جنرل گالی بہاراوی میارا (Gali Baharav-Miara) کا کہنا ہے کہ انتخابی بے ضابطگیوں کی تحقیقات میں اب تک ایسا کوئی ثبوت نہیں ملا جس سے حالیہ انتخابات کے مجموعی نتائج ذرہ برابر بھی متاثر ہوئے ہوں۔ انتخابی نتائج پر گفتگو کرتے ہوئے اسرائیلی صدر اسحاق ہرزوگ نے کہا کہ عرب ووٹروں کا غیر معمولی جوش و خروش قومی سلامتی کے وزیر ایتمار بن گویر کے عرب برادری کے ساتھ سخت رویے کا ردعمل ہے۔

صدر کے اس بیان پر عظمتِ یہود (Otzma Yehudit) جماعت کی رکنِ پارلیمان تالی گوٹلیو (Tally Gotliv) نے انہیں ’’عربوں کا پالتو یہودی‘‘ (Pet Jew) قرار دے دیا۔ بعض تجزیہ نگاروں نے اس طنز کا ترجمہ ’’عربوں کا پالتو کتا‘‘ بھی کیا ہے۔ گوٹلیو نے صدر کو مشورہ دیا کہ وہ وزیراندرونی سلامتی ایتمار بن گویر جیسے طاقتور یہودی بنیں اور ان کی جماعت کے ارکان کی طرح غیر مبہم مؤقف اختیار کریں۔اپنی رکن کی تائید کرتے ہوئے ایتمار بن گویر نے فخر سے کہا 'انہیں اس بات پر ناز ہے کہ وہ واحد شخص ہیں جس سے دہشت گردوں کے حامی خوف زدہ ہیں۔ انہوں نے عہد کیا کہ جیلوں میں قید دہشت گردوں کی زندگی جہنم بناتے رہیں گے، غیر قانونی مکانات مسمار کریں گے اور دہشت گردی کے خلاف بلا سمجھوتہ کارروائی جاری رکھیں گے'۔ انہوں نے پولیس کمشنر ڈینی لیوی پر الزام لگایا کہ اٹارنی جنرل انہیں بلیک میل کر رہی ہیں۔

آئزن کوٹ کی حکومت سازی اور عرب جماعتوں کا فیصلہ کن کردار

اسرائیلی صدر نے نیتن یاہو مخالف اتحاد کے سربراہ گادی آئزن کوٹ (Gadi Eisenkot) کو حکومت سازی کی دعوت دے دی ہے۔ فی الحال یہ کہنا قبل از وقت ہے کہ آئزن کوٹ کنیسہ (اسرائیلی پارلیمان) کے مطلوبہ 61 ارکان کی حمایت حاصل کرنے میں کامیاب ہوں گے یا نہیں۔ تاہم جوائنٹ لسٹ کے سربراہ یوسف جبارین نے CNN سے گفتگو کرتے ہوئے کہا ہے کہ ان کی جماعت حکمران اتحاد کا حصہ بنے بغیر آئزن کوٹ کو اعتماد کا ووٹ دے گی۔ ان کا واضح مؤقف تھا کہ حکومت میں شامل ہونے کا مطلب فلسطینیوں پر حملوں اور ان کے ساتھ ہونے والی ناانصافیوں کی ذمہ داری قبول کرنا ہوگا، جو ان کی جماعت کے لیے ممکن نہیں۔رعم کے سربراہ منصور عباس نے اسرائیلی صدر سے ملاقات کے بعد عندیہ دیا کہ ان کی جماعت  اعتماد کے ووٹ کے دوران آئزن کوٹ کی حمایت کرے گی، تاہم انہوں نے بھی واضح کیا کہ وہ حکومت میں شامل نہیں ہوں گے۔ صحافیوں سے گفتگو کرتے ہوئے منصور عباس نے حماس کو دہشت گرد قرار دینے سے انکار کیا۔ ان کا کہنا تھا کہ یہ نفرت کی دیوار کھڑی کرنے کا نہیں بلکہ بات چیت اور مفاہمت کے پل کے ذریعے خلیج پاٹنے کا وقت ہے۔ دوسری طرف وزیراعظم نیتن یاہو نے کہا کہ عرب جماعتوں سے اعتماد کا ووٹ لینے کے بجائے قومی حکومت قائم کر لی جائے۔

ٹرمپ کا تبصرہ اور اسرائیل کے بارے میں بدلتا امریکی رویہ

اسرائیل میں حکومت سازی کی کوششوں پر تبصرہ کرتے ہوئے صدر ٹرمپ نے کہا کہ نیتن یاہو اور گادی آئزن کوٹ کی پالیسیوں میں کوئی بڑا فرق نہیں ہوگا۔ ان کے بقول، آئزن کوٹ بھی ان سے محبت کرتے ہیں۔امریکی ٹیلی ویژن CBS کے پروگرام 60 Minutes کو ایک تفصیلی انٹرویو میں صدر ٹرمپ نے وسط مدتی انتخابات میں اپنی جماعت کی خراب کارکردگی کا تجزیہ کرتے ہوئے ایران سے جنگ، مہنگائی اور سخت گیر امیگریشن پالیسی کا ذکر کیا۔ ساتھ ہی انہوں نے یہ بھی اعتراف کیا کہ امریکی ووٹروں میں اسرائیل کے خلاف بھی شدید ناپسندیدگی پائی جاتی ہے۔

غربِ اردن میں تشدد اور پابندیوں کا تسلسل

اسرائیل میں حکومت سازی کی کشمکش کے ساتھ غربِ اردن کے مختلف علاقوں میں پُرتشدد کارروائیاں بھی جاری رہیں۔الخلیل (Hebron) میں غیر اعلانیہ کرفیو برقرار ہے، جہاں 23 اکتوبر کو ایک حملے میں دو اسرائیلی فوجیوں کی ہلاکت کے بعد سے فلسطینیوں کی نقل و حرکت محدود کر دی گئی ہے۔ نابلس میں اس ہفتے بھی پکڑ دھکڑ جاری رہی۔ جنوبی الخلیل کے قصبے مسافر یطا میں قبضہ گردوں نے لاٹھیاں مار مار کر ایک فلسطینی کو ادھ موا کر دیا۔ اس روح فرسا واقعے کا بصری تراشہ  ٹائمز آف اسرائیل نے شائع کیا۔جنین کے قصبے الزبابدہ میں اسرائیلی فوجی کی فائرنگ سے ایک 13 سالہ بچہ زخمی ہو گیا۔ عینی شاہدین کے مطابق لڑکے کے سینے کو نشانہ بنایا گیا۔

زیتون کے باغات اور انسانی حقوق کے کارکن بھی نشانے پر

زیتون کی فصل اجاڑنے اور کسانوں پر تشدد کا مشاہدہ کرنے کے لئے غربِ اردن آنے والے انسانی حقوق کے 14 غیر ملکی کارکنوں کو اسرائیل بدر کر دیا گیا۔ ان میں امریکہ، کینیڈا اور یورپ کے شہری شامل تھے۔ معاملہ یہیں تک محدود نہیں رہا؛ سابق اسرائیلی وزیراعظم ایہود اولمرٹ (Ehud Olmert) کی غربِ اردن تک رسائی بھی محدود کر دی گئی۔ وہ زیتون کی اجاڑی گئی فصل کا جائزہ لینے کے لیے علاقے برین جانا چاہتے تھے، لیکن اسرائیلی مرکزی کمان کے سربراہ جنرل ایوی بلوتھ نے ہنگامی حکم کے ذریعے اسے ’’حساس فوجی علاقہ‘‘ قرار دے کر اولمرٹ کو وہاں جانے سے روک دیا۔

بارش اور طوفان کے باوجود اہلِ غزہ کا حوصلہ

اہلِ غزہ موسم کی ایک نئی آزمائش سے دوچار ہیں۔ شدید بارش اور ژالہ باری سے خیمے گر گئے اور ضروری اشیا پانی میں بہہ گئیں۔ حیرت انگیز طور پر حماس کی شہری انتظامیہ امدادی سرگرمیوں میں پوری طرح متحرک رہی اور تین دن کے دوران 1,500 شکایات کا ازالہ کیا گیا۔ کدالوں کی مدد سے نکاسیِ آب کے عارضی راستے بنائے گئے، جبکہ شمالی غزہ میں منہدم ہونے والی ایک عمارت سے مکینوں کو صحیح سلامت نکال لیا گیا۔آزمائش کی اس گھڑی میں اہلِ غزہ کا حوصلہ قابلِ دید ہے۔ شدید بارش کے بعد انہوں نے دوبارہ خیمے تان لیے۔ ایک نوجوان نے پُرعزم لہجے میں کہا کہ اسرائیلی طیارے آگ برسائیں یا بادل طوفانی بارش، ہم اپنی سرزمین چھوڑنے والے نہیں۔ ہم اسی گلی کی ہیں خاک سے یہیں خاک اپنی ملائیں گے۔

ایمسٹرڈیم میں دو لاکھ افراد کا احتجاج

اتوار 8 نومبر کو نیدرلینڈز (ہالینڈ) کے دارالحکومت ایمسٹرڈیم میں دو لاکھ افراد غزہ نسل کشی کے خلاف سڑکوں پر نکل آئے۔ اس مظاہرے کو ’’ریڈ لائن‘‘ (Red Line) کا نام دیا گیا۔ مظاہرین نے پلے کارڈ اٹھا رکھے تھے جن پر ولندیزی زبان میں لکھا تھا: ’’HOEVEEL KINDEREN NOG?‘‘ یعنی ’’آخر کتنے اور بچے؟‘‘ یہ سوال صرف ڈچ حکومت نہیں بلکہ پوری دنیا کے ضمیر کے نام تھا۔ مظاہرین نے حکومت سے مطالبہ کیا کہ اسرائیل پر پابندیاں عائد کی جائیں۔

یورپ میں اطلاعاتی جنگ اور بیرونی سیاسی مفادات

یورپ میں رائے عامہ کو متاثر کرنے کے لیے جدید اطلاعاتی جنگ کی خبریں بھی سامنے آ رہی ہیں۔ فرانسیسی وزارتِ خارجہ کی ایک داخلی رپورٹ کے مطابق اسرائیلی حکام، اسرائیل سے منسلک میڈیا اور سوشل میڈیا اکاؤنٹس، نیز ٹرمپ نواز MAGA تحریک سے وابستہ حلقوں نے فرانس کے فسادات کو بنیاد بنا کر ایک مخصوص بیانیہ پھیلانے کی کوشش کی۔ اس بیانیے کا مرکزی نکتہ یہ تھا کہ فرانس میں بدامنی کی بنیادی وجہ اسلامی انتہا پسندی اور تارکینِ وطن کی بڑھتی ہوئی تعداد ہے۔ صدر ٹرمپ نے بھی کھل کر کہا تھا کہ ان ہنگاموں کی وجہ فرانس کی تارکینِ وطن کے لیے کھلی سرحدیں ہیں۔

خبر کے مطابق 16 سے 18 اکتوبر کے دوران X پر اسرائیلی حکام، سرکاری اکاؤنٹس، میڈیا اور ان سے وابستہ حلقوں کی دس مقبول ترین پوسٹس کو ساڑھے تین کروڑ سے زیادہ مرتبہ دیکھا گیا، جبکہ امریکی MAGA حلقوں کی دس مقبول ترین پوسٹس کے مشاہدات کی تعداد چار کروڑ نوے لاکھ سے تجاوز کر گئی۔یہ اطلاعاتی جنگ کا خطرناک پہلو ہے کہ کسی ملک کا داخلی بحران بھی بیرونی سیاسی مفادات کی جنگ کا میدان بن جاتا ہے۔ واقعات کی اصل وجوہات پس منظر میں چلی جاتی ہیں اور سوشل میڈیا پر پھیلایا جانے والا مخصوص بیانیہ عوامی رائے کو متاثر کرنے لگتا ہے۔

فلسطینیوں کی آزمائش اور بدلتی دنیا

اسرائیل میں اقتدار کی کشمکش، عرب جماعتوں کا بڑھتا ہوا سیاسی وزن، فلسطینیوں کے خلاف جاری کارروائیاں اور اسرائیل کے بارے میں امریکی و یورپی رائے عامہ میں تبدیلی، ایک دوسرے سے جڑے ہوئے عوامل ہیں۔ حکومتیں بدلنے سے شاید پالیسیوں میں فوری تبدیلی نہ آئے، لیکن عرب ووٹروں کا سیاسی کردار اور اسرائیل کی پالیسیوں پر بڑھتی ہوئی عالمی تنقید اس بات کی علامت ہے کہ پرانے سیاسی مفروضے اب پہلے کی طرح ناقابلِ سوال نہیں رہے۔

ہفت روزہ فرائیڈے اسپیشل کراچی 13 نومبر 2026

ہفت روزہ رہبر سرینگر 15 جون 2026

 

امریکی وسط مدتی انتخابات ۔۔۔  نیلی لہر اور ٹرمپ کی سیاست کو دھچکا

ریپبلکن پارٹی کے  مستقبل پر سوالیہ نشان ۔ اقلیتوں کی سیاسی قوت کا نیا اظہار

امریکہ کے 3 نومبر کے وسط مدتی انتخابات  کو امریکی سیاست میں ایک غیر معمولی عوامی ردعمل قرار دیا جا سکتا ہے۔ صدر ٹرمپ کی ریپبلکن پارٹی کو ایوانِ نمائندگان اور سینیٹ، دونوں میں اکثریت سے محروم ہونا پڑا۔ اس انتخابی دھچکے نے نہ صرف ٹرمپ انتظامیہ کی سیاسی ساکھ کو متاثر کیا ہے بلکہ 2028 کے صدارتی انتخابات کے لیے بھی نئی صف بندیوں کا آغاز کر دیا ہے۔ سیاسی اصطلاح میں اسے Blue Wave یعنی نیلی لہر کہا جا رہا ہے۔ واضح رہے کہ امریکی سیاست میں ڈیموکریٹک پارٹی نیلے اور ریپبلکن پارٹی سرخ رنگ سے پہچانی جاتی ہے۔ روایتی سیاسی علامتوں کے حوالے سے منچلوں نے اسے یوں بیان کیا کہ گدھے نے ہاتھی کو پچھاڑ دیا۔ گدھا ڈیموکریٹک پارٹی اور ہاتھی ریپبلکن پارٹی کا نشان ہے۔ اس کامیابی میں سیاہ فام، ہسپانوی نژاد اور مسلم امریکی ووٹروں کا کردار نمایاں رہا۔

ٹرمپ کا دعویٰ اور انتخابی حقیقت

انتخابی جائزوں سے اندازہ ہو رہا تھا کہ 3 نومبر کی شام صدر ٹرمپ کے لیے خوشگوار ثابت نہیں ہوگی، لیکن ریپبلکن پارٹی کی شکست اس قدر بڑی ہوگی، اس کی توقع کم ہی لوگوں کو تھی۔ صدر ٹرمپ نے شکست کے بعد دعویٰ کیا کہ اگر ان کا اپنا نام بیلٹ پیپر پر ہوتا تو ان کی جماعت بھاری اکثریت سے کامیاب ہوتی۔ تاہم انتخابی تجزیہ کاروں کے نزدیک یہ دعویٰ اصل سیاسی حقیقت سے توجہ ہٹانے کی کوشش ہے۔ وسط مدتی انتخابات میں امیدواروں کے بجائے صدر کی کارکردگی اور ان کی حکومت کی پالیسیوں کو عوام نے اپنے ووٹ کے ذریعے جانچا ہے۔

انتخاب کی شفافیت پر تحفظات کا اظہار

حسب توقع و عادت صدر ٹرمپ نے انتخابات پر شکوک و شبہات کا اظہار کردیا۔ انھوں نے سماجی رابطے کے  نجی اپلیٹ فارم TRUTHپر لکھا 'کیا واقعی یہ ’انتخابات‘ دیانت داری سے منعقد ہوئے تھے؟ رائے عامہ کے جائزوں (Polls) کے نتائج اتنے غلط کیسے ثابت ہو سکتے ہیں؟ ابتدائی ووٹوں کی گنتی کے دوران ووٹوں کے بعض بڑے بڑے ’DUMP‘ سامنے آئے، جن کے بعد جیتنا ناممکن ہو گیا تھا، خواہ کتنے ہی لوگ ووٹ ڈالنے کیوں نہ آتے۔ سارا معاملہ ووٹنگ مشینوں کا ہے، جو ووٹر سے کہیں زیادہ اہمیت رکھتی ہیں۔'  یہاں Voting Dumps سے مراد ابتدائی گنتی کے دوران ووٹوں کی بڑی تعداد میں یک مشت آمد یا اندراج ہے۔ صدر ٹرمپ نے 2020 کے صدارتی انتخابات کو بھی آج تک تسلیم نہیں کیا۔

کانگریس میں طاقت کا توازن تبدیل

تازہ ترین نتائج کے مطابق 100 رکنی سینیٹ یا راجیہ سببھا میں ڈیموکریٹک نشستوں کی تعداد 54 ہوگئی ہے،  44 کرسیوں پر رپبلکن براجمان ہیں اور دونشستوں پر گنتی جاری ہے۔ایوان نمائندگان (قومی اسمبلی یا لوک سبھا) میں ڈیموکریٹک پارٹی نے 254 اور ریپبلکن نے 164 نشستیں جیتی ہیں جبکہ 17 نشستوں کے نتائج ابھی مکمل نہیں ہوئے۔ انتخابات سے پہلے سینیٹ میں اتحادیوں کو ملاکر ڈیموکریٹک پارٹی کا پارلیمانی حجم 47 اور ریپبلکن نمائندوں کی تعداد 53 تھی۔ ایوانِ نمائندگان کی 219 نشستیں ریپبلکن پارٹی اور 214 ڈیموکریٹک پارٹی کے پاس تھیں۔

تاریخی کامیابیاں: روایتی ریپبلکن ریاستوں میں دراڑ

اس انتخابی معرکے کے بعض نتائج اپنی تاریخی اہمیت کے اعتبار سے غیر معمولی ہیں۔ ریاست کنساس میں 1932 کے بعد پہلی بار ڈیموکریٹک پارٹی نے سینیٹ کی نشست جیتی۔ ڈیموکریٹک امیدوار ایڈم ہیملٹن (Adam Hamilton) نے ریپبلکن سینیٹر راجر مارشل کو شکست دے کر تقریباً ایک صدی سے قائم انتخابی روایت توڑ دی۔

ریاست شمالی کیرولائنا میں ڈیموکریٹک امیدوار رائے کوپر (Roy Cooper) نے ریپبلکن امیدوار مائیکل واٹلی کو شکست دی۔ جنوبی کیرولائنا میں بھی ڈیموکریٹک امیدوار ڈاکٹر اینی اینڈریوز (Annie Andrews) نے ریپبلکن امیدوار ڈارلین گراہم کو ہرا کر سینیٹ کی نشست حاصل کرلی۔ یہ دونوں کامیابیاں اس لئے اہم ہیں کہ ان ریاستوں کو روایتی طور پر ریپبلکن پارٹی کا مضبوط گڑھ سمجھا جاتا ہے۔ آیووا میں ڈیموکریٹک امیدوار جوش ٹوریک (Josh Turek) نے سینیٹ کی نشست جیتی، جبکہ ریاستی گورنر کے انتخاب میں بھی ڈیموکریٹک امیدوار روب سینڈ (Rob Sand) کامیاب ہوئے۔ اس طرح ایک ہی انتخاب میں ریاستی اور وفاقی سطح پر ریپبلکن پارٹی کو بڑا دھچکا لگا۔ مین (Maine)میں ریپبلکن پارٹی کی سوزن کالنز 1996 سے سینیٹڑ منتخب ہوتی چلی آئی ہیں لیکن مسلسل پانچ بار جیتنے والی کالنز صاحبہ کو اس بار ڈیموکریٹک امیدوار ٹرائے جیکسن (Troy Jackson) نے شکست دے ی۔ اوہائیو میں بھی سابق ڈیموکریٹک سینیٹر شیرڈ براؤن (Sherrod Brown) نے ریپبلکن سینیٹر جان ہسٹڈ کو ہرا کر اپنی نشست واپس حاصل کرلی۔مسڑ براؤن 2024 کے انتخاب میں شکست کھا گئے تھے۔یہ نشست جے ڈی وینس کے نائب صدر بننے کی وجہ سے خالی ہوئی تھی۔

مشیگن: مسلمان امریکی سیاست کا نیا سنگ میل

مشیگن کا انتخابی مقابلہ عالمی سطح پر خصوصی توجہ کا مرکز بنا۔ ڈیموکریٹک امیدوار ڈاکٹر عبد الرحمن محمد السید المعروف عبدل السید (Abdul El-Sayed) نے سینیٹ کی نشست جیت کر امریکی تاریخ میں پہلے مسلمان سینیٹر منتخب ہونے کا اعزاز حاصل کیا۔ مصری نژاد ڈاکٹر السید کو انتخابی مہم کے دوران صدر ٹرمپ اور ریپبلکن رہنماؤں کی جانب سے سخت تنقید کا سامنا کرنا پڑا۔ ان کی مذہبی شناخت، امریکہ سے وفاداری اور سیاسی نظریات کو انتخابی بحث کا موضوع بنایا گیا۔ اس کے باوجود ان کی کامیابی اس بات کا اظہار ہے کہ امریکی مسلم شہری اب محض انتخابی مہموں میں توجہ حاصل کرنے والا طبقہ نہیں رہے بلکہ قومی سیاسی اداروں میں نمائندگی بھی حاصل کر رہے ہیں۔ڈاکٹر السید کی کامیابی کو صرف مسلم امریکیوں کی فتح سمجھنا درست نہیں ہوگا۔ یہ امریکی معاشرے میں مذہبی اور نسلی تنوع کی بڑھتی ہوئی سیاسی اہمیت کا بھی اظہار ہے۔ اس انتخاب میں جنوبی کیرولائنا سے ڈاکٹر اینی اینڈریوز کی کامیابی اور اوہائیو میں ڈاکٹر ایمی ایکٹن (Amy Acton) کا گورنر منتخب ہونا بھی قابلِ ذکر ہے۔ یوں طبی اور سائنسی شعبوں سے تعلق رکھنے والی شخصیات کی سیاسی نمائندگی میں اضافہ ہوا۔

ٹیکسس: ریپبلکن قلعے میں شگاف

ڈیموکریٹک پارٹی کو سب سے بڑی کامیابی ٹیکسس (Texas)میں  ہوئی جہاں سینٹر اور گورنر کے ساتھ اٹارنی جنرل، کمپٹرولر، ریاستی سپریم کورٹ اور اپیلٹ کورت کی تمام نشتوں پر ڈیموکریٹس جیت گئے اور ہرمنصب پر ووٹوں کی تعداد بھی تقریباً یکساں رہی جس سے اندازاہ ہوتا ہے کہ لوگوں نے پورے ڈیموکریٹ پینل کو ووٹ دیا۔ٹیکسس میں یہ تبدیلی اس لئے بھی اہم ہے کہ ریپبلکن پارٹی طویل عرصے سے اسے اپنی محفوظ سیاسی ریاست سمجھتی رہی ہے۔ حلقہ بندیوں میں اپنے حق میں تبدیلیوں (Gerrymandering) کے باوجود پارٹی کو مطلوبہ انتخابی تحفظ حاصل نہ ہوسکا۔ اس نتیجے سے یہ بھی ظاہر ہوتا ہے کہ انتخابی حلقوں کی حد بندی میں سیاسی فائدہ حاصل کرنے کی کوششیں عوامی رجحانات کو مکمل طور پر تبدیل نہیں کرسکتیں۔

فلوریڈا میں ریپبلکن کی کارکردگی نسبتاً بہتر رہی  اور حکمراں جماعت  سینیٹ کے ساتھ گورنر کی نشست بھی برقرار ہنے میں کامیاب رہی۔تاہم اکثر جگہ ڈیموکریٹس کے ووٹوں کی تعداد میں اضافہ ہوا۔ علی الاعلان مسلمانوں خلاف نفرت انگیز بیانیہ رکھنے والے رینڈی فائن نے فلورڈا کے حلقہ 6 سے اپنی نشست برقرار رکھی۔ اسی طرح مسلمانوں کو امریکہ کیلئے خطرہ کہنے والے ٹامی ٹبروِل 52 فیصد ووٹ لیکر الابامہ کا گورنر منتخب ہوگئے۔

جے ڈی وینس کا اعتراف: شکست کی چار وجوہات

انتخابی نتائج پر امریکی نائب صدر جے ڈی وینس کا تبصرہ خصوصی اہمیت رکھتا ہے۔ ایک طویل ٹویٹ (X) میں انہوں نے تسلیم کیا کہ 2024 میں ٹرمپ اور وینس کو ووٹ دینے والے ہزاروں امریکیوں نے اس بار ڈیموکریٹک امیدواروں کی حمایت کی۔ ان کے مطابق مسئلہ صرف ووٹروں کی انتخابی سرگرمی یا ٹرن آؤٹ کا نہیں بلکہ ریپبلکن پارٹی کے پکّے ووٹروں کا دوسری طرف چلے جانا تھا۔وینس نے ایک انتخابی تجزیہ کار کے سروے کا حوالہ دیتے ہوئے ان ووٹروں کی واپسی کے لئےچار بنیادی مطالبات بیان کئے: ایران جنگ ختم کی جائے، مہنگائی اور روزمرہ اخراجات پر توجہ دی جائے، امریکہ اور امریکی مفادات کو اولین ترجیح دی جائے اور اسرائیل کے ساتھ امریکہ کے تعلقات پر نظرثانی کی جائے۔اس بیان کا سب سے غیر معمولی پہلو اسرائیل کے ساتھ تعلقات میں تبدیلی کی ضرورت کا اعتراف ہے۔ روایتی طور پر ریپبلکن پارٹی اسرائیل کی غیر مشروط حمایت کرتی رہی ہے، لیکن اب اسی جماعت کی اعلیٰ قیادت میں اس پالیسی پر سوالات اٹھ رہے ہیں۔ وینس نے ایران جنگ کے بارے میں یہاں تک کہا کہ اگر کوئی یہ سمجھتا ہے کہ سینیٹ کی آئندہ چھ سالہ مدت کے لیے اکثریت کھونے کی قیمت پر یہ جنگ جاری رکھنا درست تھا تو اسے کھل کر اس موقف کا دفاع کرنا چاہئے۔یہ محض انتخابی شکست کا اعتراف نہیں بلکہ 2028 کے صدارتی انتخابات کے لیے ریپبلکن پارٹی کے اندر ممکنہ نظریاتی تبدیلی کا اشارہ بھی ہے۔ وینس خود مستقبل میں صدارتی امیدوار بننے کے خواہش مند سمجھے جاتے ہیں اور ان کے اس بیان کو ٹرمپ انتظامیہ کی خارجہ پالیسی سے فاصلہ پیدا کرنے کی کوشش کے طور پر بھی دیکھا جا رہا ہے۔

معاشی دباؤ اور خارجہ پالیسی کا انتخابی خمیازہ

بلاشبہ ایران جنگ اور اس کے نتیجے میں توانائی کی قیمتوں میں اضافے نے امریکی رائے عامہ کو متاثر کیا۔ اس کے ساتھ چین، کینیڈا اور برازیل سمیت مختلف تجارتی شراکت داروں پر عائد محصولات (Tariffs) نے بھی مہنگائی کے دباؤ میں اضافہ کیا۔ امریکی ووٹروں کے لئے خارجہ پالیسی کا مسئلہ اس وقت مزید اہم ہوگیا جب اسے محسوس ہوا کہ بیرونِ ملک جنگوں اور فوجی اخراجات کی قیمت بالآخر اسے اپنی جیب سے ادا کرنا پڑ رہی ہے۔ امیگریشن کے معاملے میں ٹرمپ انتظامیہ کی سخت گیر پالیسی اور امیگریشن اینڈ کسٹمز انفورسمنٹ (ICE) کی کارروائیوں نے ہسپانوی نژاد امریکیوں میں بے چینی پیدا کی۔ غیر قانونی تارکین وطن کے خلاف کارروائی اور امریکی شہریوں کے حقوق کے تحفظ کے درمیان توازن برقرار نہ رکھنے کی شکایات نے حکومت کے لیے سیاسی مشکلات پیدا کیں۔

مسلمان امریکیوں کے حوالے سے بھی صدر ٹرمپ کا رویہ ان کی سابقہ انتخابی مہم کے وعدوں سے مختلف دکھائی دیا۔ 2024 میں انہوں نے غزہ امن اور مشرقِ وسطیٰ میں جنگ کے خاتمے کی بات کی تھی۔ مشیگن، وسکونسن اور ایریزونا جیسی ریاستوں میں مسلمان ووٹروں کی حمایت نے ان کی کامیابی میں کردار ادا کیا تھا۔ لیکن اقتدار میں آنے کے بعد مسلمانوں کے خلاف ان کے  بیانات، کانگریس کی رکن الہان عمر پر ذاتی حملے اور ڈاکٹر عبدل السید کی مذہبی شناخت کو انتخابی ہتھیار بنانا اس طبقے میں بداعتمادی کا باعث بنا۔دوسری طرف تنوع، مساوات اور شمولیت (Diversity, Equity and Inclusion — DEI) کے پروگراموں کو محدود کرنے کی پالیسی نے سیاہ فام امریکیوں میں بھی تحفظات پیدا کئے۔ فوج میں ٹرانس جینڈر افراد کی خدمات کے حوالے سے سخت اقدامات نے ایک اور سماجی طبقے میں بے چینی پیدا کی۔

یوں انصاف، شفاف طرزِ حکمرانی، معاشی آسودگی، نسلی امتیاز سے تحفظ اور تمام شہریوں کی سیاسی و سماجی شمولیت کے مشترکہ مطالبات نے مختلف اقلیتی طبقات کو ڈیموکریٹک پارٹی کے قریب کردیا۔ انتخابی نتائج سے یہ تاثر بھی ملتا ہے کہ امریکی معاشرے میں مذہبی اور نسلی شناخت سے قطع نظر شہری حقوق اور معاشی مفادات اب انتخابی فیصلوں میں زیادہ اہمیت اختیار کر رہے ہیں۔

نمائندگی کی نئی تاریخ

ان انتخابات کا ایک اہم پہلو مختلف نسلی، مذہبی اور سماجی طبقات کی سیاسی نمائندگی میں اضافہ ہے۔نیوہیمپشائر سے کرس پاپاز (Chris Pappas) کی سینیٹ میں کامیابی بھی قابلِ ذکر ہے۔ وہ امریکی تاریخ کے پہلے ہم جنس پرست سینیٹر ہوں گے۔ تاریخ میں پہلی بار ایک سیاہ فام  برائن ڈانلڈ، فلورڈا کے گورنر منتخب ہوئے، جناب ڈانلڈ کا تعلق ریپبلکن پارٹی سے ہے۔ ٹیکسس میں ڈیموکریٹک پارٹی کی جینا ہیناہوسا (Gina Hinojosa)نے  ریاست کی پہلی ہسپانوی نژاد گورنر ہونے کا اعزاز اپنے نام کیا۔ جارجیا میں ڈیموکریٹک پارٹی کی کیشا لینس باٹمز ریاست کی پہلی خاتون اور پہلی سیاہ فام گورنر منتخب ہوگئیں۔  لتیشا پلمر،  ہیرس کاونٹی (Harris County, Houston)کی پہلی مسلم جج منتخب ہوگئیں۔

غزہ کے ایک میڈیکل کیمپ میں زخمیوں کا علاج کرنے والے امریکی فوج کے سابق لیفٹینیٹ کرنل اور مشہور پلاسٹک سرجن ڈاکٹر آدم ہشام حموی 70.2 فیصد ووٹ لیکر نیوجرسی کے حلقہ 12 سے امریکی کانگریس کے رکن منتخب ہوگئے۔ ان کامیابیوں کو محض چند انفرادی شخصیات کی کامیابی سمجھنا درست نہیں ہوگا۔ یہ امریکی جمہوریت میں نمائندگی کے بدلتے ہوئے رجحانات اور مختلف طبقوں کی سیاسی شرکت میں اضافے کی علامت ہیں۔

اسرائیل میں سرمایہ کاری بندکی جائے۔

عام انتخابات کے دوران امریکی ریاست رھوڈآئی لینڈ Rhode Islandکے دارالحکومت پرویڈنس کے شہریوں سے مشورہ طلب کیا گیا کہ کیا بلدیاتی فنڈ سے اسرائیل میں سرمایہ کاری کی جائے؟ تو 75 فیصد لوگوں نے اسرائیل میں سرمایہ کاری کی مخالفت کی۔

اسرائیل کے لیے امریکی امداد  میں کٹوتی

انتخابات کے روز صدر ٹرمپ نے اسرائیل کو دی جانے والی تقریباً چار ارب ڈالر سالانہ فوجی امداد ختم کرنے کا اعلان کیا۔ ان کے مطابق اسرائیل اب معاشی طور پر اتنا مستحکم ہے کہ اسے امریکی مالی معاونت کی ضرورت نہیں رہی۔ تاہم اس اعلان کو محض مالیاتی فیصلہ سمجھنا درست نہیں ہوگا۔ صدر ٹرمپ نے خود اس کا تعلق امریکی سیاست میں اسرائیل کی حمایت کے خلاف بڑھتی ہوئی تنقید سے جوڑا اور ڈاکٹر عبدل السید کا نام بھی لیا۔یہاں ایک اہم قانونی پہلو بھی قابلِ توجہ ہے۔ امریکہ اور اسرائیل کے درمیان 2016 میں طے پانے والے دس سالہ معاہدے کے تحت 2019 سے 2028 تک مجموعی طور پر 38 ارب ڈالر کی فوجی معاونت کا وعدہ کیا گیا تھا۔ اس لئےصدر کا اعلان اپنی جگہ اہم تو ہے، لیکن امداد کی عملی بندش کے لئے کانگریس کے بجٹ اور موجودہ معاہدے سے متعلق قانونی تقاضے بھی اہم ہوں گے۔

عوامی فیصلے کے بعد تصادم یا مفاہمت؟

یہ کہنا قبل از وقت ہوگا کہ انتخابی شکست کے بعد صدر ٹرمپ اپنی پالیسیوں میں کیا تبدیلی لائیں گے۔ تاہم ایک بات واضح ہے کہ کانگریس کے دونوں ایوانوں میں ڈیموکریٹک اکثریت کے بعد ان کے لئے قانون سازی اور بجٹ کی منظوری کا راستہ پہلے سے کہیں زیادہ دشوار ہوگا۔ صدر ٹرمپ نے انتخابی نتائج کے باوجود اپنی پالیسیوں کے دفاع کا عندیہ دیا ہے اور واضح کیا ہے کہ انہیں ناپسندیدہ قانون سازی کی صورت میں صدارتی ویٹو کا اختیار استعمال کرنے سے گریز نہیں ہوگا۔ دوسری طرف ڈیموکریٹس کو انتظامیہ کے فیصلوں کی نگرانی، تحقیقات اور احتساب کے لئےدونوں ایوانوں کی کمیٹیوں کا کنٹرول حاصل ہوگیا ہے۔اصل امتحان یہ ہوگا کہ صدر ٹرمپ عوامی فیصلے کو اپنی پالیسیوں پر نظرثانی کا موقع سمجھتے ہیں یا اسے سیاسی محاذ آرائی کا نیا مرحلہ بنا دیتے ہیں۔ جمہوری نظام میں انتخابات صرف اقتدار حاصل کرنے کا ذریعہ نہیں بلکہ حکمرانوں کے احتساب کا بھی ایک مؤثر طریقہ ہیں۔

خراب گھڑی بھی دن میں دو بار درست وقت بتاتی ہے!

آخر میں ایک دلچسپ جملے پر گفتگو کا اختتام۔ نومنتخب سینیٹر ڈاکٹر عبدل السید نے صدر ٹرمپ کی جانب سے اسرائیل کی فوجی امداد ختم کرنے کے اعلان کا خیرمقدم کرتے ہوئے کہا: “A broken clock is right twice a day.” یعنی خراب گھڑی بھی دن میں دو بار درست وقت بتاتی ہے۔

یہ مختصر طنزیہ جملہ امریکی انتخابی سیاست اور اسرائیل کے ساتھ تعلقات میں آنے والی تبدیلیوں کا ایک دلچسپ استعارہ بن گیا ہے۔ اس میں محض صدر ٹرمپ پر طنز نہیں بلکہ امریکی عوام کے اس بڑھتے ہوئے مطالبے کی جھلک بھی ہے کہ ملکی وسائل اور ٹیکس دہندگان کا پیسہ بیرونی تنازعات کے بجائے اپنے شہریوں کی فلاح و بہبود پر خرچ ہونا چاہیے۔

ہفت روزہ فرائیڈے اسیشل کراچی 13 نومبر 2026

ہفت روزہ    دعوت دہلی 13 نومبر 2026

ہفت روزہ  رہبر 15 نومبر 2026

 

ووٹ اور بارود کے درمیان عشرہ انتخابات

برازیل، اسرائیل اور امریکہ کے انتخابی معرکے؛ جمہوری عمل پر جنگی سیاست کے سائے

اتوار 25 اکتوبر سے 3 نومبر تک کے دس دنوں کو بجا طور پر ’’عشرۂ انتخابات‘‘ کہا جا سکتا ہے۔ اس عرصے میں لاطینی امریکہ کی سب سے بڑی معیشت،  برازیل میں صدارتی انتخاب کا فیصلہ کن مرحلہ مکمل ہوا، اسرائیل میں پارلیمانی انتخابات ہوئے اور امریکہ میں وسط مدتی انتخابات کی مہم اپنے عروج پر پہنچ گئی۔ بظاہر یہ تین الگ ملکوں کے انتخابی معرکے ہیں، لیکن ان کے پس منظر میں عالمی سیاست، مشرقِ وسطیٰ کی کشیدگی اور جنگ کے امکانات نمایاں رہے۔

برازیل: فلسطین کے حامی لولا کی کامیابی

برازیل میں 25 اکتوبر کو صدارتی انتخابات کا دوسرا اور فیصلہ کن مرحلہ مکمل ہوا، جس میں فلسطینی ریاست کے حامی صدر لوئیز اناسِیو لولا دا سلوا (Luiz Inácio Lula da Silva) چوتھی صدارتی مدت کے لیے منتخب ہوگئے۔ چار اکتوبر کو ہونے والے پہلے مرحلے میں لبرل پارٹی (PL) کے فلاویو بولسونارو (Flávio Bolsonaro) 47.03 فیصد ووٹوں کے ساتھ پہلے نمبر پر آئے تھے، جبکہ صدر لولا کو 45.16 فیصد ووٹ ملے تھے۔ چونکہ کوئی امیدوار مطلوبہ اکثریت حاصل نہ کرسکا، اس لیے دونوں کے درمیان براہِ راست مقابلہ ہوا، جس میں لولا نے 51.79 فیصد ووٹ لے کر کامیابی حاصل کی۔

ٹرمپ اور بولسونارو خاندان کی قربت

فلاویو بولسونارو سابق صدر جائر بولسونارو کے صاحبزادے ہیں، جنہیں ڈونلڈ ٹرمپ کا سیاسی حلیف سمجھا جاتا ہے۔ ٹرمپ نے جائر بولسونارو کے خلاف عدالتی کارروائی پر سخت اعتراض کیا تھا اور ان کے خلاف مقدمے کو ’’وِچ ہنٹ‘‘ (Witch Hunt) یعنی سیاسی انتقام قرار دیتے ہوئے برازیل پر بھاری درآمدی محصولات بھی عائد کیے تھے۔ لولا کی کامیابی کے اگلے ہی روز ٹرمپ نے، کسی قابلِ تصدیق ثبوت کے بغیر، برازیل کے انتخاب کو ’’دھاندلی زدہ‘‘ قرار دے دیا۔

فلسطین کے لئے ایک اہم سفارتی آواز

صدر لولا نے غزہ کی جنگ میں اسرائیلی حکومت کی پالیسیوں پر سخت تنقید کی، فلسطینیوں کے حقِ خود ارادیت اور آزاد فلسطینی ریاست کی حمایت کی اور برازیل کی خارجہ پالیسی میں فلسطین کے مسئلے کو نمایاں رکھا۔ کولمبیا میں  فلسطین کے حامی امیدوار ایوان سیپیڈا (Iván Cepeda) جون کے صدارتی انتخاب میں شکست کھا چکے ہیں۔ ایسے ماحول میں لولا کی کامیابی سے فلسطینیوں کو عالمی سطح پر ایک اہم سفارتی حامی میسر رہے گا۔

اسرائیل: انتخابی مہم میں ایران کا خطرہ

دو دن بعد، 27 اکتوبر کو اسرائیل میں پارلیمانی انتخابات ہوئے۔ وزیراعظم بن یامین نیتن یاہو کی انتخابی مہم میں ایران کے ساتھ کشیدگی اور جنگی بیانیہ نمایاں رہا۔ تل ابیب اور دوسرے بڑے شہروں میں ان کے انتخابی بل بورڈوں پر عبرانی زبان میں لکھا تھا: ’’ہمارے پاس جیتنے کا ایک ہی موقع ہے!‘‘ ان کے ساتھ نیتن یاہو اور امریکی صدر ڈونلڈ ٹرمپ کی تصاویر، اسرائیلی پرچم اور جنگی طیارے دکھائے گئے۔ اس تشہیری مہم کا تاثر یہ تھا کہ عسکری قوت اور ٹرمپ سے قربت ہی اسرائیل کو ایران کے خلاف فتح دلا سکتی ہے۔

ایران: انتخابی سیاست کا مرکزی موضوع

نیتن یاہو اور ٹرمپ دونوں نے انتخابی مہم کے دوران ایران کے جوہری پروگرام کو اپنی کامیابی کے طور پر پیش کیا۔ نیتن یاہو نے ایرانی جوہری خطرے کو اسرائیلی ووٹروں کی حمایت حاصل کرنے کے لیے استعمال کیا۔ انہوں نے تل ابیب پر ایرانی جوہری حملے کی ایک تخیلاتی تصویر بھی ٹویٹر پر شائع کی۔ ان کے پیغام کا خلاصہ یہ تھا کہ ایران کا جوہری خطرہ باقی تمام سیاسی تنازعات سے بڑا ہے اور ٹرمپ کے اقتدار کے باقی دو سال اسرائیل کے لئے اس خطرے کے خاتمے کا تاریخی موقع ہیں۔ گویا نیتن یاہو کی مخالفت کرنے والے ووٹر اسرائیل کی بقا کو خطرے میں ڈال سکتے ہیں۔ دوسری طرف ٹرمپ ایران کے جوہری پروگرام کو تباہ یا غیر مؤثر بنانے کا کریڈٹ لیتے ہوئے یہ تاثر دے رہے تھے کہ اس کامیابی کے مقابلے میں موجودہ مہنگائی کی قیمت معمولی ہے۔ یوں ٹرمپ اپنی فوجی کامیابی کا دعویٰ کرکے امریکی ووٹروں کو متاثر کرنا چاہتے تھے، جبکہ نیتن یاہو ایرانی خطرے کو اپنی قیادت کے حق میں دلیل بنا رہے تھے۔

واشنگٹن: انتخابات کے بعد نئی جنگ کا خدشہ

امریکہ میں 3 نومبر کو وسط مدتی انتخابات (Midterm Elections) ہوئے۔ انتخابی مہم کے دوران صدر ٹرمپ نے کبھی مبہم اور کبھی واضح انداز میں اشارہ دیا کہ ووٹنگ کے بعد ایران کے خلاف ایک مختصر مگر شدید فوجی کارروائی ہوسکتی ہے، جس میں عسکری اہداف کے ساتھ توانائی کی تنصیبات بھی نشانہ بن سکتی ہیں۔ صدر نے ایک موقع پر کہا کہ امریکہ ایران کے باقی ماندہ ایک یا دو اہم اہداف کو چند منٹوں میں نشانہ بنا سکتا ہے۔ نیتن یاہو کے بیانات سے بھی یہی تاثر ملتا ہے کہ کسی نئی کارروائی میں اسرائیل امریکہ کے شانہ بشانہ ہوگا۔

امریکی سینیٹر کی تشویش

انتخابی مہم کے بعد ایران پر حملے کے امکان کو محض قیاس آرائی سمجھنا درست نہیں۔ امریکی سینیٹ کی خارجہ تعلقات کمیٹی کے رکن کرس مرفی (Chris Murphy) نے 28 اکتوبر کو انکشاف کیا کہ بعض سینیٹروں کو ایران کے خلاف ممکنہ فوجی کارروائی کے منصوبے پر تفصیلی بریفنگ دی گئی ہے۔ مرفی نے اس منصوبے پر سخت تشویش ظاہر کرتے ہوئے خبردار کیا کہ ایسی کارروائی جنگ کو مزید پھیلا اور طویل کرسکتی ہے۔ ان کا بیان اس امر کا اشارہ ہے کہ واشنگٹن میں نئی فوجی کارروائی کے امکانات پر سنجیدہ غور جاری ہے، اگرچہ صدر ٹرمپ نے ابھی حتمی فیصلہ نہیں کیا۔

تہران کا جواب: اگلی جنگ زیادہ طویل ہوسکتی ہے

امریکی دھمکیوں کے جواب میں ایرانی فوج کے ترجمان بریگیڈیئر جنرل محمد اکرم نیا (Mohammad Akraminia) نے خبردار کیا ہے کہ اگر امریکہ نے دوبارہ جنگ مسلط کی تو یہ گزشتہ معرکے سے بھی زیادہ طویل ہوسکتی ہے۔ ان کے بقول جنگ کے دورانیے اور اختتام کی شرائط کا فیصلہ صدر ٹرمپ نہیں کرسکیں گے۔ اس سے ایک روز قبل ایران کے رہبرِ معظم آیت اللہ مجتبیٰ خامنہ ای نے بھی فوجی قیادت کو ہدایت کی تھی کہ کسی نئے امریکی یا اسرائیلی حملے کی صورت میں جواب جغرافیائی حدود تک محدود نہ رکھا جائے اور امریکی و اسرائیلی اہداف کے دائرے کو وسیع کیا جائے۔ یہ بیانات خطے میں ممکنہ نئے تصادم کے خطرے کی شدت ظاہر کرتے ہیں، اگرچہ دھمکیوں کو حقیقی عسکری صلاحیت کا مکمل پیمانہ نہیں سمجھنا چاہیے۔

دوحہ: سفارت کاری کا دروازہ ابھی کھلا ہے

جنگی دھمکیوں کے متوازی سفارتی محاذ پر بھی مثبت پیش رفت جاری ہے۔ ایرانی وزیر خارجہ عباس عراقچی سفارت کاری کا راستہ کھلا رکھنے کی بات کر رہے ہیں، جبکہ ان کے امریکی ہم منصب مارکو روبیو نے کہا کہ صدر ٹرمپ نے ابھی نئے حملوں کا فیصلہ نہیں کیا اورسفارتی حل امریکہ کی ترجیح ہے۔ رائٹرز کے مطابق ایرانی مذاکرات کار 31 اکتوبر کو دوحہ میں قطری ثالثوں سے ملے، جہاں جنگ بندی اور تنازعے کے خاتمے کے امکانات پر بات ہوئی۔ اس سے پہلے قطری وفد تہران میں ایرانی حکام سے بارہ گھنٹے سے زیادہ مذاکرات کرچکا تھا اور واشنگٹن سے بھی مسلسل رابطے میں تھا۔ امریکہ چاہتا ہے کہ ایران کا جوہری پروگرام ابتدا ہی سے مذاکرات کا حصہ ہو، جبکہ تہران کا اصرار ہے کہ پہلے امریکی بحری ناکہ بندی ختم اور ایرانی تیل کی برآمدات پر پابندیاں اٹھائی جائیں۔ اختلافات گہرے ضرور ہیں، لیکن مذاکرات کا جاری رہنا امید کا ایک اہم پہلو ہے۔

اسرائیل میں بھی نئی جنگ پر اختلاف

اسرائیلی انتخابات کے بعد ایران کے خلاف ممکنہ نئی کارروائی پر داخلی اختلاف بھی نمایاں ہونے لگا ہے۔ حزبِ اختلاف کی جماعت ڈیموکریٹس کے سربراہ یائر گولان (Yair Golan) نے خبردار کیا ہے کہ ایران کے ساتھ ایک اور فوجی تصادم کا امکان بڑھ رہا ہے، لیکن نیتن یاہو کے پاس ایسی جنگ کی قیادت کے لیے مطلوبہ عوامی اعتماد، اخلاقی جواز اور بنیادی صلاحیت موجود نہیں۔ گولان کے مطابق اسرائیل ایران کے ساتھ بار بار فوجی تصادم کے ایک ایسے سلسلے میں داخل ہوچکا ہے جو نیتن یاہو کی ناکامی کو نمایاں کرتا ہے۔ ان کا کہنا ہے کہ اسرائیل کی سلامتی کو وزیراعظم کی سیاسی بقا کی جدوجہد کا ذریعہ نہیں بننا چاہیے۔ یہ بیان ظاہر کرتا ہے کہ ایران پالیسی پر اختلاف صرف اسرائیل اور اس کے بیرونی ناقدین کے درمیان نہیں، خود اسرائیلی سیاسی قیادت میں بھی موجود ہے۔

مکہ دفاعی معاہدہ: خطے میں مکالمے کی کوشش

اسی پس منظر میں مکہ مشترکہ دفاعی معاہدے کے رکن ممالک کے اعلیٰ عہدیداروں اور ایرانی قیادت کی ملاقات بھی خاصی اہمیت رکھتی ہے۔ 26 اکتوبر کو تہران میں ہونے والی اس ملاقات میں سعودی وزیر دفاع شہزادہ خالد بن سلمان، پاکستان کے فیلڈ مارشل عاصم منیر اور ترکیہ کے سربراہِ قومی سراغرسانی ابراہیم قالن نے شرکت کی۔ ایرانی صدر ڈاکٹر مسعود پزیشکیان اور قومی سلامتی کونسل کے سربراہ محسن رضائی سے بھی بات چیت ہوئی۔ ایرانی صدر نے اس ملاقات کو حوصلہ افزا قرار دیتے ہوئے کہا کہ برادر ممالک کے درمیان علاقائی سلامتی اور تعاون پر نتیجہ خیز گفتگو ہوئی۔ اس پیش رفت کا مثبت پہلو یہ ہے کہ سعودی عرب کے دفاع کے لیے قائم ہونے والا یہ تعاون ایران کے ساتھ براہِ راست مکالمے اور کشیدگی کم کرنے کی کوشش بھی کر رہا ہے۔ یمن میں حوثی تنازعے اور ایران سعودی کشیدگی کو مزید پھیلنے سے روکنا پورے خطے کے مفاد میں ہے۔ امریکہ ایران کشیدگی کے تناظر میں یہ علاقائی سفارت کاری خصوصی اہمیت اختیار کرگئی ہے۔

ووٹ کی خوشبو اور بارود کا تعفن

منصفانہ، آزادانہ، غیر جانب دار اور شفاف انتخابات مہذب معاشروں کی باوقار اور قابلِ فخر سرگرمی ہیں، جن کے ذریعے شہری حقِ حکمرانی کی تجدید یا تبدیلی کا فیصلہ bloodکے بجائے Ballot سے کرتے ہیں۔ برازیل اور اسرائیل دونوں میں عوامی شرکت نمایاں رہی۔ برازیل میں ووٹ ڈالنے کا تناسب تقریباً 80.8 فیصد اور اسرائیل میں 77.9 فیصد رہا۔ امریکہ میں بھی انتخابی جوش و خروش دیدنی ہے۔ 29 اکتوبر تک تین کروڑ نوے لاکھ سے زیادہ امریکی قبل از وقت یا ڈاک کے ذریعے ووٹ ڈال چکے تھے۔ ٹیکساس میں ہم نے خود وہیل چیئر پر بیٹھے درجنوں بیمار اور ضعیف افراد کو ووٹ ڈالتے دیکھا، جن کے ساتھ آکسیجن سلنڈر بھی تھے۔ یہ منظر جمہوری عمل میں شہریوں کی شرکت اور اپنے حقِ رائے دہی کے استعمال کے عزم کی یاد دہانی ہے۔ امریکی انتخابات کے نتائج کچھ بھی ہوں، انتخابی عمل میں عوام کی اس کثرت سے شرکت جمہوریت کے لیے خوش آئند ہے۔ لیکن افسوس کہ بیلٹ پیپر کی خوشبوئے جانفزا کے پس منظر میں بارود کا تعفن اس کی مسرت کو گہنا رہا ہے۔ برازیل، اسرائیل اور امریکہ کے انتخابی مناظر ہمیں یاد دلاتے ہیں کہ جمہوریت کا اصل حسن عوام کے حقِ انتخاب میں ہے، جبکہ جنگی سیاست اس حق کے ثمرات کو خوف، عدم تحفظ اور تباہی میں بدل سکتی ہے۔ دنیا کو اس وقت انتخابی نعروں سے زیادہ ایسے سیاسی فیصلوں کی ضرورت ہے جو عوام کے ووٹ کا احترام کریں اور انہیں ایک اور جنگ کی قیمت ادا کرنے پر مجبور نہ کریں۔

ہفت روزہ فرائیڈے اسپیشل کراچی 6 نومبر 2026

 

اسرائیلی انتخابات: عرب ووٹ سے خوف یا جمہوریت کا امتحان؟

نیتن یاہو کے اقتدار کی کشمکش، حکومت سازی کے تین راستے اور عرب جماعتوں کی تاریخی پیش رفت

اسرائیل کے حالیہ انتخابات نے ایک بار پھر ثابت کیا ہے کہ جمہوریت کا اصل امتحان صرف ووٹ گننے اور نشستیں تقسیم کرنے میں نہیں، بلکہ انتخابی نتائج کو تسلیم کرنے اور ان کے سیاسی تقاضے قبول کرنے میں ہوتا ہے۔ وزیراعظم بنیامین نیتن یاہو کے حامی اتحاد کو 53 نشستیں ملیں، جبکہ ان کے مخالفین 48 اور عرب قیادت والی جماعتیں مجموعی طور پر 19 نشستیں حاصل کرنے میں کامیاب ہوئیں۔ یوں 120 رکنی کنیسہ (پارلیمان) میں حکومت سازی کے لیے درکار 61 نشستوں کی اکثریت کسی ایک سیاسی اکائی کو حاصل نہیں ہوئی۔عرب جماعتیں پہلی بار اس قدر مضبوط پارلیمانی حیثیت میں سامنے آئی ہیں کہ ان کی حمایت کے بغیر نیتن یاہو مخالف جماعتوں کے لیے حکومت بنانا مشکل ہے۔

متناسب نمائندگی: ووٹ کی طاقت اور انتخابی نظام

اسرائیل کے انتخابی نظام کا اجمالی تعارف قارئین کے لئے دلچسپی کا باعث ہو سکتا ہے۔ یہاں کنیسہ کے انتخابات متناسب نمائندگی (Proportional Representation) کے اصول پر ہوتے ہیں۔ ملک کو انفرادی انتخابی حلقوں میں تقسیم کرکے ہر حلقے سے ایک رکن منتخب کرنے کے بجائے، پورا ملک ایک واحد انتخابی حلقہ شمار ہوتا ہے اور ووٹر کسی امیدوار کے بجائے سیاسی جماعت کو ووٹ دیتے ہیں۔ جماعتوں کو ملک بھر میں حاصل ہونے والے ووٹوں کے تناسب سے پارلیمان میں نشستیں ملتی ہیں، البتہ 3.25 فیصد سے کم ووٹ لینے والی جماعتیں پارلیمانی نمائندگی سے محروم رہتی ہیں۔ اس نظام کا اہم فائدہ یہ ہے کہ کسی حلقے میں دوسرے نمبر پر آنے والی جماعت کے ووٹ مکمل طور پر بے اثر نہیں ہوتے، ملک بھر میں حاصل ہونے والی حمایت پارلیمانی نشستوں میں تبدیل ہو سکتی ہے۔ پاکستان اور ہندوستان میں اس کے برعکس قومی اسمبلی یا لوک سبھا کے بیشتر عام انتخابات میں ہر حلقے سے سب سے زیادہ ووٹ لینے والا امیدوار کامیاب قرار پاتا ہے۔ چنانچہ کسی جماعت کو ملک بھر میں خاصے ووٹ ملنے کے باوجود، اگر وہ مختلف حلقوں میں دوسرے نمبر پر رہے تو ان ووٹوں کے تناسب سے نشستیں نہیں ملتیں۔

اسرائیل کے عرب شہری اور ان کا سیاسی وزن

اسرائیل کی آبادی کا تقریباً پانچواں حصہ فلسطینی نژاد عرب شہریوں پر مشتمل ہے، جن میں مسلمان، عیسائی اور دروز شامل ہیں۔ قانونی طور پر انہیں ووٹ ڈالنے، سیاسی جماعتیں بنانے، پارلیمان کا رکن منتخب ہونے اور دیگر شہری سرگرمیوں میں حصہ لینے کے حقوق حاصل ہیں۔ تاہم 2018 کے بنیادی قانون (Nation-State Law) نے قومی حقِ خودارادیت کو یہودی عوام کے ساتھ مخصوص کیا، جس سے عرب شہریوں کے مساوی قومی تشخص کا سوال مزید نمایاں ہوا۔ ایک اہم تضاد یہ بھی ہے کہ غربِ اردن کی اسرائیلی قبضہ بستیوں میں رہنے والے اسرائیلی شہری کنیسہ کے انتخابات میں ووٹ دے سکتے ہیں، جبکہ ان کے قریب رہنے والے فلسطینیوں کو یہ حق حاصل نہیں۔

اہم عرب سیاسی جماعتیں

رَعَم (Ra’am) عرب شہریوں کے مسائل اور اسرائیلی پارلیمانی سیاست میں عملی شرکت پر توجہ دیتی ہے۔ اس کا تعلق جنوبی اسلامی تحریک سے ہے اور 2021 میں یہ نفتالی بینیٹ اور یائیر لاپید کی مخلوط حکومت میں شامل ہوئی تھی۔ حَدَاش (Hadash) بائیں بازو کا یہودی عرب مشترکہ سیاسی اتحاد ہے، جبکہ تَعال (Ta’al) احمد طیبی کی قیادت میں عرب سیاسی جماعت ہے۔ بَلَد (Balad) فلسطینی عرب قومی شناخت اور شہری مساوات پر زور دیتی ہے۔ ان جماعتوں کی سیاسی ترجیحات ایک جیسی نہیں؛ بعض اسرائیلی حکومتوں میں شامل ہوکر عرب آبادی کے مسائل حل کرنے کی حامی ہیں، جبکہ دوسری فلسطینی قومی حقوق اور اسرائیل کی ریاستی شناخت سے متعلق بنیادی سوالات اٹھاتی ہیں۔ اس انتخاب میں رَعَم کے سوا باقی تین عرب جماعتوں نے قائمہ المشترکہ (Joint List) کے بینر تلے حصہ لیا۔ اس اتحاد نے 11 اور رَعَم نے 8 نشستیں حاصل کیں۔ یوں عرب جماعتوں کی مجموعی نمائندگی 19 نشستوں تک پہنچ گئی، جو ان کے لئے ایک تاریخی کامیابی ہے۔

عرب جماعتیں: انتخابی حاشیے سے فیصلہ کن مقام تک

انتخابی کامیابی کے بعد جوائنٹ لسٹ کے سربراہ یوسف جبارین نے اعلان کیا کہ ان کی جماعت نیتن یاہو حکومت کے خاتمے کے لیے سیاسی تعاون پر آمادہ ہے۔ ان کا کہنا ہے کہ عرب شہریوں نے اس انتخاب کو اپنی سیاسی بقا اور مستقبل کا معاملہ سمجھ کر ووٹ دیا۔ تاہم جبارین نے واضح کیا ہے کہ تعاون کے لیے سیاسی مفاہمت اور باہمی احترام ضروری ہے۔ وہ عرب جماعتوں سے متعلق شکوک و شبہات اور ان کے ووٹ کو مشکوک بنانے کی کوششوں کو خطرناک سیاسی مہم قرار دیتے ہیں۔

جبارین نے چینل 12 کو انٹرویو میں کہا کہ ان کی جماعت 7 اکتوبر 2023 کو غزہ کے سرحدی اسرائیلی آبادیوں میں ہونے والے قتلِ عام کی مذمت کر چکی ہے۔ تاہم جب ان سے فلسطینی مزاحمتی تنظیم کو دہشت گرد قرار دینے کے بارے میں براہِ راست سوال کیا گیا تو انہوں نے یہ مطالبہ قبول نہیں کیا اور کہا کہ فلسطینی سیاسی تحریکوں کو دہشت گرد کہنا درست نہیں۔ اس موقف سے ظاہر ہوتا ہے کہ حکومت مخالف یہودی جماعتوں اور عرب قیادت کے درمیان تعاون کی راہ ہموار نہیں ۔

یائر گولان: عرب ووٹ بھی یہودی ووٹ کے برابر ہے

اسرائیلی بائیں بازو کی جماعت ڈیموکریٹس کے سربراہ یائر گولان نے حکومت مخالف جماعتوں سے مطالبہ کیا ہے کہ عرب جماعتوں کو سیاسی عمل سے الگ رکھنے کے بجائے ان کے ساتھ حکومت سازی کے امکان پر غور کیا جائے۔ ان کا کہنا ہے کہ جمہوری اسرائیل میں کوئی شہری دوسرے درجے کا نہیں۔ عرب علاقوں سخنین یا رہط میں ووٹ ڈالنے والے شہری کا ووٹ تل ابیب یا سدروت میں ووٹ ڈالنے والے یہودی شہری کے ووٹ کے برابر ہے۔ گولان نے کہا کہ جو لوگ صبح جمہوریت کے دفاع کی بات کرتے ہیں، وہ شام کو لاکھوں شہریوں کے ووٹ کو ان کے نام یا نسلی پس منظر کی بنیاد پر مسترد نہیں کر سکتے۔

اسی سلسلے میں گولان نے یائیر لاپید اور رَعَم کے سربراہ منصور عباس سے الگ الگ ملاقاتیں بھی کیں۔ یہ ملاقاتیں نیتن یاہو کی حکومت کا متبادل تلاش کرنے کے لیے سیاسی رابطوں کا حصہ ہیں۔ تاہم گولان کے اس مؤقف کو ابھی حزب اختلاف کی تمام جماعتوں کی حمایت حاصل نہیں۔ گادی آئزنکوٹ، نفتالی بینیٹ اور ایوگدور لیبرمین سمیت بعض اہم رہنماؤں نے عرب جماعتوں کو حکومتی اتحاد میں شامل کرنے یا ان پر انحصار کرنے کے بارے میں تحفظات ظاہر کئےہیں۔ منصور عباس نے بھی تسلیم کیا ہے کہ عرب ارکان کی حمایت سے اقلیتی حکومت بنانا آسان نہیں ہوگا۔

تل ابیب کا بل بورڈ: 67 نشستوں نے تبدیلی کا انتخاب کیا

تل ابیب میں انتخابی نتائج کے بعد لگائے گئے ایک بل بورڈ پر لکھا ہے: ’’67 نشستوں کے ووٹروں نے تبدیلی کا انتخاب کیا‘‘ اور اس کے نیچے درج ہے: ’’عوام کی اکثریت نے نیتن یاہو کو ہٹانے کا فیصلہ کیا ہے۔‘‘ اس کا اشارہ اس حقیقت کی طرف ہے کہ نیتن یاہو کے 53 کے مقابلے میں حکومت مخالف اور عرب جماعتوں نے مجموعی طور پر 67 نشستیں حاصل کی ہیں۔ یہ بل بورڈ دراصل ایک سیاسی پیغام ہے کہ اکثریت کو حکومت سازی کا حق ملنا چاہیے اور منتخب عرب نمائندوں کے لیے ایوانِ اقتدار کے دروازے بند نہیں کیے جانے چاہییں۔

حکومت سازی کے تین ممکنہ راستے ۔ نیتن یاہو کی پانچوں انگلیاں گھی میں

پہلا راستہ یہ ہے کہ نیتن یاہو مخالف محاذ قائمہ المشترکہ کے تعاون سے حکومت قائم کرلے۔ اس صورت میں 67 نشستوں کی طاقت سے ایک مستحکم حکومت قائم ہوسکتی ہے۔ فی الحال حزبِ اختلاف 'اچھوتوں' کی طرف دیکھنے کی روادار نہیں۔ لیکن سیاست میں کوئی راستہ ہمیشہ کے لیے بند نہیں ہوتا۔

دوسرا راستہ قومی اتحاد کی حکومت ہے، جس میں نیتن یاہو اور ان کے مخالفین کی بعض جماعتیں مل کر حکومت چلائیں۔ لیکن اس کے لیئے وزارتِ عظمیٰ، کابینہ کی تشکیل اور مذہبی و انتہا پسند جماعتوں کے کردار پر اتفاق ضروری ہوگا۔ نیتن یاہو کے بعض مخالفین ان کی زیرِ قیادت  کام کرنے کو تیارنہیں۔،دوسری طرف دائیں بازو کے اتحادیوں کو چھوڑنا بھی نیتن یاہو کے لیے آسان نہیں ہوگا۔

تیسرا راستہ ایک اور انتخاب ہے۔ اگر سیاسی جماعتیں اپنے اختلافات کم نہ کر سکیں اور کوئی قابلِ عمل اتحاد سامنے نہ آئے تو اسرائیل کو دوبارہ انتخابات کی طرف جانا پڑ سکتا ہے۔ اس صورت میں نیتن یاہو نئی حکومت قائم ہونے تک نگران وزیراعظم کے طور پر برقرار رہ سکتے ہیں۔ پارلیمانی نظام میں نگراں حکومت کے اختیارات بہت محدود ہوتے ہیں لیکن ہنگامی صورتحال کی بناپر بطور نگراں وزیراعظم انھیں لامحدود اختیارات حاصل ہیں اور اسوقت انھیں کینیسہ کے احتساب کا بھی کوئی ڈر نہیں۔ گویا حکومت سازی میں تعطل نیتن یاہو کیلئے طول اقتدار کا نادر موقع بن گیا ہے۔ تجزیہ نگاروں کا خیال ہے کہ نئے انتخاب کے نتائج حالیہ چناو سے بہت زیادہ مختلف نہیں ہونگے اور سیاسی تعطل برقرار رہیگا۔

جمہوریت کا اصل امتحان

اسرائیل کے حالیہ انتخابات نے عرب شہریوں کی سیاسی شرکت کو ایک اقلیتی مسئلے سے بڑھا کر حکومت سازی کا مرکزی سوال بنا دیا ہے۔ اگر عرب شہری اسرائیل کے قانونی انتخابی نظام کے تحت ووٹ دیتے ہیں، پارلیمان میں نمائندگی حاصل کرتے ہیں اور حکومت سازی میں حصہ لینا چاہتے ہیں تو محض عرب شناخت کی بنیاد پر ان کے سیاسی کردار کو مسترد کرنے کا جواز کیا ہے؟ کیا جمہوریت کا اصول صرف اسی وقت قابلِ قبول رہتا ہے جب انتخابی نتائج اکثریتی گروہ کی سیاسی ترجیحات کے مطابق ہوں؟ فلسطینیوں کے جائز حقوق کی حمایت اور ان کی قومی جدوجہد کے بارے میں اختلافِ رائے کو دہشت گردی کے لیبل میں سمیٹ دینا مسئلے کا حل نہیں۔ اسرائیل کے لیے اصل امتحان یہ ہے کہ وہ اپنے عرب شہریوں کو محض ووٹ ڈالنے کا حق دینے پر اکتفا کرتا ہے یا ان کے منتخب نمائندوں کو بھی اقتدار کی تشکیل میں جائز شریک تسلیم کرتا ہے۔ جمہوریت کی ساکھ کا فیصلہ نعروں سے نہیں، اسی عملی رویے سے ہوگا۔

ہفت روزہ فرائیڈے اسپیشل کراچی 6 نومبر 2026

ہفت روزہ دعوت دہلی 6 نومبر 2026

ہفت روزہ رہبر سرینگر 8 نومبر 2026