افکارِ پریشاں

متحدہ عرب امارات اوربحرین کے بعد سوڈان

سوڈان اور اسرائیل اپنے باہمی تعلقات معمول پر لانے کیلئے تیار ہوگئے ہیں۔ اس بات کا اعلان جمعہ (23 اکتوبر) کو قصرِ مرمریں کے اپنے بیضوی دفتر میں صحافیوں سے باتیں کرتے ہوئے صدر  ڈونالڈ ٹرمپ نے کیا جہاں فون پر اسرائیلی وزیراعظم بن یامین نیتھن یاہو، سوڈان عبوری فوجی کونسل کے سربراہ جنرل عبدالفتاح برہان اور وزیراعظم ڈاکٹر عبداللہ حملوک بھی موجود تھے۔ امریکی صدر نے بتایا کہ اسرائیل اور سوڈان نے ایک دوسرے کے ساتھ امن قائم کرنے پر رضا مندی ظاہر کی ہے۔ صدر ٹرمپ نے فخریہ اندازمیں کہا کہ سوڈان تیسرا ملک ہے جو معاہدہ ابراہیم کے تحت اسرائیل سے تعلقات قائم کررہا ہے۔ اس موقع پر امریکی صدر نے دعویٰ کیا کہ جلد ہی کئی دوسرے  ممالک بھی اسرائیل کے ساتھ تعلقات استوار کریں گے۔صدر ٹرمپ یہاں تک کہہ گئے کہ جلد ہی فلسطینی بھی اسرائیل کو تسلیم کرلیں گے۔ تاہم جس وقت امریکی صدر واشنگٹن میں اپنے امیدافزا الفاظ سےامن کے دیپ جلا رہے تھے عینی اسی وقت رملہ سے جاری ایک بیان میں مقتدرہ فلسطین کے صدر محمود عباس نے اسرائیل اور سوڈان کے مابین اس  پیش رفت کو فلسطینیوں کی پیٹھ میں چھرا گھونپنے سے تعبیر کیا۔

سیاسی تجزیہ نگاروں کا خیال ہے کہ اسرائیل سے تعلقات کے باب میں سوڈان کی فوجی جنتا کوعوام کی جانب سے شدید ردعمل کا خوف ہے اسی بنا پر مشترکہ اعلامئے میں الفاط کا انتخاب بہت سوچ سمجھ کر کیا گیا ہے۔ بیان کے مطابق آئندہ چند ہفتوں میں دونوں ممالک زراعت، معیشت، تجارت، ہوا بازی اور سوڈانی یہودیوں کی اسرائیل منتقلی کے معاملات سمیت باہمی امور پر تعاون کی راہیں تلاش کرنے کیلئے مذاکرات شروع کریں گے۔ یعنی اس میں سفارتی تعلقات قائم کرنے کے بارے میں کوئی یقین دہانی شامل نہیں۔ اس احتیاط کا مزید مظاہرہ اسوقت دیکھنے میں آیا جب سوڈان کے عبوری وزیرخارجہ عمر جمال الدین نے خرطوم میں صحافیوں سے باتیں کرتے ہوئے کہا کہ تعلقات کو معمول پر لانے کا آغاز  سوڈانی مقنہہ سے توثیق کے بعد ہوگا اوراب تک کے اقدامات تعلقات کو معمول پر لانے کیلئے محض گفتگو کا آغاز ہے۔ ہمیں سفارتی تعلقات کی بحالی کیلئے پارلیمان اور جمہوری اداروں کے قیام (انتخاب) تک انتظار کرنا ہوگا کہ اہم فیصلے عوامی امنگوں کے مطابق  منتخب ہونے والی قیادت ہی کرسکتی ہے۔ دوسری طرف اسرائیل وزیرِ اعظم اس اعلان پر بہت پرجوش ہیں۔ اپنے ایک بیان میں انھوں نےمعاہدے کو امن کے لیے ایک زبردست کوشش قرار دیا۔

سوڈانی عوام کی مخالفت کے باوجود فوجی جنتا یہ کڑوی گولی نگلنے کو کیوں تیار ہوئی تو آج کی نشست میں اسی حوالے سے چندگزارشات نذر قارئین کی جائینگی جسکا آغاز ہم  پس منظر سے پہلے پیش منظر پر گفتگو سے کرتے ہیں

گزشتہ ہفتے  اپنے ایک ٹویٹ میں صدر ٹرمپ نے کہا تھا کہ وہ سوڈان کو دہشت گردوں کی معاونت کرنے والے ممالک کی فہرست سے نکالنے کا ارادہ رکھتے ہیں اور صدر کی ترجمان کیلی این مک اینی نے ایک بیان میں بتایا کہ صدر نے اپنے ارادے سے امریکی کانگریس کو بھی مطلع کر دیا ہے۔ اسی کے ساتھ امریکہ نے بین الاقوامی قرضے کے حصول کیلئے سوڈان کی مدد کا وعدہ کیا ہے۔ یعنی دہشت گردی کی زنجیر کٹتے ہی سوڈان برضا و رغبت آئی ایم ایف اور وولڈ بینک قرضوں کا نقرئی بلکہ طلائی قلادہ اپنے گلے میں ڈال لے گا۔ زنجیر بھی تیری ہے دیوانہ بھی تیرا ہے۔

سوڈان سے پہلے ملا عبدالغنی برادر، ملا عبدالسلام ضعیف اور عباس ستانکزئی سمیت بہت سے نامی گرامی افغان 'دہشت گردوں ' کو بیک جنبش قلم نیک چال چلن کی اسناد جاری کی جاچکی ہیں۔ ان میں سے کئی پاکستان کے بدنام زمانہ 'سیف ہاوسز' (safe houses) میں بدترین تشدد کی بھٹی سے گزارے گئے اور کچھ 'خوفناک دہشت گرد'  گوانتا نامو کے عقوبت کدوں کی زینت بھی بنے لیکن نہ تو ان میں سے کسی پر فرد جرم عائد ہوئی اور نہ ہی انکے ماتھے پر ثبت کلنک کے ٹیکے کو کھرچ کر پہلو نشینی سے سرفراز کرنے وجہ بتائی گئی۔ پس ثابت یہ ہوا کہ دہشت گرد وہ ہے جو ہماری بات نہ مانے۔ حکم عدولی پر ملا ضعیف جیسے مستند سفارتکار کو سرعام برہنہ کرکے  مشکیں کس دی گئیں لیکن ضرورت پڑنے پر اسی 'دہشت گرد' کو مذاکرات کار قرار دیکر انکا سفارتی رتبہ بحال کردیا گیا۔ سب سے بڑے دہشت گردملا برادر کی عزت افزائی کا توکیا پوچھنا کہ ملا صاحب کو  شہنشاہ معظم نے بذریعہ فون ہم کلامی کا شرف عطا فرمایا۔کس میں ہمت ہے کہ اقوام متحدہ کی انسداد دہشت گردی کمیٹی سے پوچھے کہ نیک بخت! دہشت گرد کے اوصاف حمیدہ ہیں کیا جسکی بنیاد پر کسی شخص کو بمعہ زن و بچہ کولہو پلوادیا جائے؟

اب کچھ گفتگو صدر ٹرمپ کے مشرق وسطیٰ امن منصوبے پر جسکا اعلان اس سال 28 جنوری کو کیا گیا۔ اس معاہدے میں  اسرائیل کے ساتھ فلسطینی ریاست کی ضمانت دی گئی تھی۔ لیکن معاہدے کی تیاری میں تنازعے کے دوسرے فریق یعنی فلسطین کو شریک مشورہ تو دور کی بات اعلان سے پہلے اعتماد میں بھی نہیں لیا گیا۔181 صفحات پر مشتمل یہ دستاویزجسے صدر ٹرمپ نے ڈیل آف دی سنچری قراردیا تھا، امریکہ کے داماد اول جیررڈ کشنر نے تحریر فرمائی ہے۔ فلسطینیوں نے یہ ' ڈیل' یکسر مسترد کردی۔ مقتدرہ فلسطین کے سربراہ محمود عباس کا کہنا تھا کہ تجویز پر غور تو دور کی بات وہ متعفن  کچرے کے اس181صفحاتی ڈھیر کو ردی کی ٹوکری میں بھی جگہ دینے کو تیار نہیں۔

فلسطینیوں کے اس صاف انکار پر جیرارڈ کشنر نے عرب و اسرائیل امن معاہدے سے فلسطینیوں کو الگ کردینے کی مہم شروع کی جسے معاہدہ ابراہیم کا نام دیا گیا یعنی حضرت ابراہیم سے منسوب تینوں مذاہب کے ماننے والوں کا عہدِ امن۔ یہ مہم کامیاب رہی اور سب سے پہلے متحدہ عرب امارات نے اسرائیل کو تسلیم کرلیا جسکے کچھ ہی دن بعد بحرین نے اسرائیل سے سفارتی تعلقات قائم کرنے کا اعلان کردیا۔ان دستاویزات کی سب سے اہم بات یہ ہے کہ ان دونوں میں فلسطینی ریاست یا اسرائیل فلسطین تنازعے کے حل کا کوئی ذکر ہی نہیں۔ اس کی وضاحت کرتے ہوئےصدر ٹرمپ کی موجودگی میں امریکہ کے داماد اول نے کہا کہ معاہدہ ابراہیم کے بعد عرب و مسلم ممالک فلسطینی ترجیحات سے بالاتر ہوکر اپنے قومی مفاد کے مطابق فیصلے کررہے ہیں۔ گویا جیررڈ کشنرنے عرب اسرائیل تعلقات کے گلے میں پھنسی فلسطین کی ہڈی کو بہت خوبصورتی سے باہر نکال دیاہے۔

انتخابی مہم میں تیزی آنے پر صدر ٹرمپ کو  ایک چشم کشا سفارتی کامیابی کی ضرورت تھی۔ اسی دوران یورپ کے مسلم اکثریتی ملک کوسووو نے نہ صرف اسرائیل کو تسلیم کرلیا بلکہ انکے وزیراعظم عبداللہ ہوتی نے یہ کہہ کر صدر ٹرمپ کی طبیعت کو باغ باغ کردیا کہ کوسووو اپنا سفارتخانہ بیت المقدس میں تعمیر کریگا۔

اس کامیابی کے باوجود صدر ٹرمپ چاہتے تھے کے امریکی انتخابات سے پہلےسعودی عرب اسرائیل کو تسلیم کرلے۔ اس مقصد کیلئے جیررڈ کشنر نے اپنے 'دوست' سے فون پر تفصیلی گفتگو کی۔ جناب کشنر نے اس بات چیت کو امریکی اصطلاح میں 'دوستانہ chatقراردیا۔ جس کے بعد سعودی عرب کو راضی کرنے کیلئے امریکی وزیرخارجہ ریاض تشریف لے گئے لیکن بات نہ بنی۔ 24 اکتوبر کو اسرائیلی اخبارہارٹز Haaretz نے سعودہ ولی عہد کے قریبی دوست و معروف سرمایہ کار و فلمسازجناب حائم شعبان کے حوالے سے انکشاف کیا کہ سلمان بن محمد (MBS)اپنی جان کے ڈر سے اسرائیل کو تسلیم نہیں کررہے ہیں۔ اسکندریہ ،مصر کے یہودی خاندان میں جنم لینے والے 76 سالہ حائم شعبان اسرائیل کیساتھ امریکی شہریت کے بھی حامل ہیں۔ جمعہ  کو فلورڈا میں جو بائیڈن کے ایک آن لائن انتخابی جلسے سے خطاب کرتے ہوئے معروف حائم شعبان نے بتایا کہ ان سے گفتگو میں MBSنے خطرہ ظاہر کیا تھا کہ اگر سعودی عرب نے متحدہ عرب امارات اور بحرین کی طرح اسرائیل کے تسلیم کیا تو ایرانی و قطری ایجنٹ بلکہ شائد سعودی ہی اپنے ولی عہد کو قتل کردیں۔ تادم تحریر مسٹر شعبان کے اس انکشاف پرسعودی عرب کی جانب سے کوئی ردعمل سامنے نہیں آیا۔

سعودی عرب کی جانب سے مایوسی کے بعد اسرائیل کیلئے نئے دوستوں کی تلاش کا کام شروع ہوا اور  قرعہ فال سوڈان کے نام نکلا ۔ بحر احمر کے ساحل پر لیبیا، چاڈ، ایریٹیریا اور ایتھوپیا کے پڑوس میں واقع  4 کروڑ نفوس پر مشتمل سوڈان ایک وقت میں افریقہ کا نسبتاً خوشحال ملک شمار ہوتا تھا۔زراعت عروج پر تھی اور تیل کے چشموں نے اسکی قومی دولت میں اضافہ کردیا۔ لیکن  پڑوسی ممالک اور بڑی طاقتوں کی مداخلت سے فروغ پانے والی  خانہ جنگی نے اسکا دیوالیہ نکال دیا۔رہی سہی کسر باوردی حکمرانوں کی کرپشن نے  پوری کر دی۔

1993میں امریکہ نے اسامہ بن لادن کو پناہ دینے کا الزام لگا کر سوڈان کو  دہشت گردوں کی اعانت   کرنے والے ملکوں کی فہرست میں ڈال دیا۔اسکے نتیجے میں ملک پر سخت معاشی پابندیاں عائد کردیں  گئیں۔ سوڈان نے اسکی تردید کی لیکن چچا سام کے آگے کس کی چلتی ہے۔1998میں تنزانیہ اور کینیا کے امریکی سفارتخانوں پر حملے کا الزام بھی  سوڈان کے سر منڈھ دیا گیا۔ امریکی حکام کاکہنا تھا کہ  حملے کے منصوبہ بندی القاعدہ نے سوڈان میں کی تھی۔ اسکے دوسال بعد  12 اکتوبر 2000کو عدن (یمن) کی بندرگاہ پر ایندھن بھرتے ہوئے امریکہ کے جنگی جہاز کول (USS Cole)کو نشانہ بنایا گیا۔ خود کش حملے میں 16 امریکی اہلکار ہلاک ہوگئے۔ سی آئی اے کا خیال ہے کہ اس  حملے کی منصوبہ بندی بھی سوڈان میں کی گئی تھی۔

نائن الیون (9/11)حملوں کے بعد ایک غیر تحریری 'نئے عالمی نظام یا New World Orderکا اجرا ہوا جسکی بنیاد کا اعلان کرتے ہوئے امریکی صدر بش نے کہا تھا کہ ' اگر دہشت گردی کی جنگ میں تم ہمارے ساتھ نہیں تو دہشت گردوں کیساتھ ہو'۔ اور دنیا کے مخلتف ممالک اور تنظیموں پر دہشت گرد کا ٹھپہ لگانے کا نیا سلسلہ شروع ہوا۔سوڈان پر پابندیاں مزید سخت کرنے کیساتھ امریکہ اور یورپی یونین نے جنوبی سوڈان کے علیحدگی پسندوں کی حمائت تیز کردی. سوڈان کے آمر مطلق جنرل عمر البشیر کو لارا دیاگیا کہ اگر وہ جنوبی سوڈان کی برضا و رغبت علیحدگی قبول کرلیں تو انکے ملک کو دہشت گردوں کی فہرست سے نکال لیا جائیگا چنانچہ عمرالبشیر ریفرنڈم پر رضامند ہوگئے۔ جنوری 2011کے استصواب میں 98 فیصد افراد نے مکمل آزادی کے حق میں رائے دی اور سوڈانی پارلیمنٹ نےعوامی رائے کا احترام کرتے ہوئے جنوبی سوڈان کوآزاد کرنے کا اعلان کردیا۔

تیل سے مالامال جنوبی حصے کی علیحدگی نے سوڈان کی کمر توڑ دی اور غلہ برآمد کرنےوالےسوڈان کو کھانے کے لالے پڑگئے۔ لیکن ان مشکلات کے باوجود ملک کی بے ایمان و بے رحم  فوجی جنتا نے لوٹ مار جاری رکھی۔ 2018کے آخر میں سوڈانیوں کا پیمانہ صبر لبریز ہوگیا اور نہتے عوام فوجی ہیڈکوارٹر کے باہر دھرنا دے کر بیٹھ گئے۔ اسی کیسا تھ سارے ملک میں لوگ سڑکوں پر آگئے۔عوامی تحریک کے نتیجے میں جنرل عمرالبشیر کو فوجی جنتا نے  معزول  تو کردیالیکن ملک کی باگ ڈور 'بلڈی' سویلین کے حوالے کرنے کے بجائے ایک انقلابی عبوری کونسل تشکیل دیدی گئی جسکے سربراہ  جنرل عبدالفتاح البرہان ہیں۔ عوام کی اشک شوئی کیلئے ماہر معاشیات ڈاکٹر عبداللہ حمدوک کو وزیراعظم بنادیا گیا۔ عبوری کونسل جیسا کہ نام سے ظاہر ہے انتخابات کے انتظامات کیلئے بنائی گئی ہے لیکن  انتخابات سے پہلے احتساب کا نعرہ لگاکر چناو کو  2022 تک ملتوی کردیا گیا۔

عبوری کونسل کے سربراہ مغرب میں قبولیت کیلئے پہلے دن سے اسرائیل کوتسلیم کرنے کی کوششوں میں مصروف ہیں۔ سویلین وزیراعظم چاہتے ہیں کہ اس قسم کے کلیدی فیصلے کو منتخب حکومت کیلئے چھوڑدیاجائے لیکن جنرل صاحب دوامِ اقتدار کی خواہش میں  اسرائیل سے تعلقات کیلئے بے قرارہیں۔ اس سال سال فروری میں انھوں نے اسرائیلی وزیراعظم سے  براہ  راست ملاقات کی تھی۔ یہ  رازونیاز یوگینڈا کے شہر انتیبے  میں ہوئے جسے سوڈانیوں سے خفیہ رکھا گیا لیکن اسرائیلی میڈیا نے اسکا بھانڈا پھوڑدیا۔

ٹرمپ انتظامیہ کی طرف سے سوڈان کو ترغیب دی گئی ہے کہ اسرائیل کو تسلیم کرنے کی صورت میں اسے دہشت گرد ملکوں کی فہرست سے نکال دیا جائیگا۔ افغانستان میں جس فراخدلی سے 'دہشت گردوں' کو نیک چلن کے اسناد جاری کی گئی ہیں جباریت سے لبریز کچھ ایسا ہی مشفقانہ انداز یہاں بھی ہے۔ سوال یہ ہےکہ اگر  تنزانیہ وکینیا کے سفاتخانے اور امریکی بحری جہاز پر حملے میں واقعی سوڈان ملوث ہے تو کیا یہ گھناونے جرائم اس کے نامہ اعمال سے بس اتنی سی بات پر محو کردئےجائینگے کہ خرطوم نے اسرائیل کو ایک آزاد و خودمختار ریاست تسلیم کرلیا ہے؟

عوامی امنگوں کے خلاف فیصلہ کرکے بھی سوڈان کی مشکلات اتنی آسانی سے ختم ہوتی نظر نہیں آتیں۔ دہشت گرد واقعات کے متاثرین کو سوڈان کی جانب سے  تاوان کی ادائیگی بھی اس سودے کا حصہ ہے۔واشنگٹن کے صحافتی حلقوں کا کہنا ہے کہ  سوڈان کی عبوری حکومت نے 33 کروڑ 50 لاکھ ڈالر کی رقم ایک امریکی اکاؤنٹ میں جمع کرادی ہےجو متاثرین و لواحقین کو دی جائے گی۔ سوڈان کے قانونی ماہرین  کو اس بندوبست پر تشویش ہے۔ انکا کہنا ہے کہ تاوان کی ادائیگی کا مطلب دہشت گرد سرگرمی کا اعتراف ہے اور پہلی قسط کی ادائیگی پر ذیلی و اضافی  متاثرین بھی سامنے آسکتے ہیں لیکن خود کو عقلِ کل سمجھنے والے جنرل صاحب نے اپنے اقتدار کا تسلسل یقینی بنانے کیلئے سوڈانی ماہرین سے مشورہ کئے بغیر یہ خطیر رقم امریکہ کے حوالے کردی۔  

سوڈان کے ماہرینِ  قانون نے جن خدشات کا اظہار کیا تھا وہ ابھی سے درست ثابت ہونے لگے ہیں۔ صدر ٹرمپ کی پریس کانفرنس کے فوراً بعد دہشت گردی متاثرین کے وکلا نے سوڈان کی جانب سے فراہم کردہ رقم کو بہت کم قراردیا ہے۔ یہ ایک دیوانی مقدمہ ہے جس میں امریکی حکومت مداخلت نہیں کرسکتی اور اب جبکہ سوڈان نے جرم کا سرکاری طور پر اعتراف کرلیا ہے خرطوم عدالت کے فیصلے کا پابند ہے۔ عدالتیں اس قسم کے مقدمات میں عام طور سے سائلین کے مطالبات کی حمائت کرتی ہیں۔ متاثرین کی  نمائندہ تنظیم Sudan Terror Victims Groupنے سوڈان کی جانب سے معاوضہ کی پیشکش کو مسترد کر دیا ہے۔

سوڈان کی گلو خلاصی کی ضمن میں ایک اور رکاوٹ یہ بھی ہے کہ اسکو امریکی کانگریس نے دہشت گرد ملک قراردیا تھا چنانچہ پاکدامنی کی سند بھی کانگریس کی توثیق کے بعد جاری ہوگی۔ عام انتخابات میں اگر صدر ٹرمپ شکست کھاگئے تو جو بائیڈن اس پورے معاملے پر نظر ثانی کا حکم دے سکتے ہیں اور کانگریس بھی متاثرین کے دباو میں آکر تاوان کی رقم میں اضافے کا مطالبہ کرسکتی ہے۔

دوسری طرف سوڈانی فوجی جنتا اور عبوری حکومت کی جانب سے اسرائیل کو تسلیم کئے جانے کی تجویز کو سوڈان کی سیاسی جماعتوں نے مسترد کردیا ہے۔ملک کی سب سےبڑی جماعت نیشنل اُمّہ پارٹی، بائیں بازو کی بعث پارٹی اور قوم پرست پاپولر کانگریس پارٹی نے جنرل برہان کے فیصلے کو مینڈیٹ سے تجاوز قرار دیا ہے۔خرطوم میں صحافیوں سے باتیں کرتے ہوئے سابق وزیراعظم اور اُمّہ پارٹی کے سربراہ صادق المہدی نے کہا کہ عبوری کونسل کا کام انتخاب کروانا ہے اور اسے اس نوعیت کے کلیدی فیصلے کرنے کا اختیار نہیں۔جناب مہدی نے کہا کہ سوڈان کے عوام جرنیلوں کے فیصلے کو تسلیم نہیں کرتے
سوڈان کے شہروں میں اسرائیل کو تسلیم کئے جانے کے خلاف مظاہرے بھی شروع ہوگئے ہیں، فرانس میں گستاخانہ خاکوں کی بڑے پیمانے پر اشاعت نے مسلم دنیا میں ہیجان پیدا کردیا ہے اور اس تناظر میں اسرائیل سے تعلقات پر عام سوڈانی خاصہ مشتعل ہے۔

خرطوم کے صحافتی حلقوں کا خیال ہے کہ جلد بازی میں جنرل برہان نے اپنے ملک کو ایک نئی مشکل میں مبتلا کردیا ہے۔ متحدہ عرب امارات اور بحرین کے برعکس سوڈانی عوام اپنے حقوق اور رائے کے جرات مندانہ اظہار کیلئے سڑکوں پر آنے کے عادی ہیں۔ ایک طرف سوڈانی عوام مسئلہ فلسطین کے حل سے پہلے اسرائیل کو تسلیم کرنے پر تیار نہیں تودوسری جانب امریکی کانگریس سے دہشت گردی کا لیبل ہٹوانا بھی ایک صبر آزما کام ہے۔ اگلے ہفتے عام انتخابات کے بعد نئی کانگریس کا  اجلاس جنوری کے پہلے ہفتے میں ہوگا۔ پارلیمانی سال کا پہلا ایک مہینہ کمیٹی سازی میں صرف ہوجاتا ہے۔ اسکے علاوہ کرونا وائرس کے متاثرین کی مالی مدد یا stimulus  پیکیج، بیمہ صحت، امیگریشن اصلاحات اور دوسری اہم قانون سازی ہونی ہے۔ اس دوران ترغیب کاروں (Lobbyists) کے ذریعے متاثرین اور ان کے وکلا کانگریس کو اپنے حق میں ہموار کرچکے ہونگے۔ دوام اقتدار کی جرنیلی خواہشات نے سوڈان کو بند گلی میں لاکھڑا کیا ہے اور ڈر ہے کہ کہیں سوڈانیوں کیلئے یہ سو پیاز اور سو جوتےوالامعاملہ نہ بن جائے

ہفت روزہ فرائیڈے اسپیشل کراچی 30 اکتوبر 2020

ہفت روزہ دعوت دہلی 30 اکتوبر 2020

ہفت روزہ رہبر سرینگر یکم نومبر

2020