سری لنگا میں خونریزی

آج جب  دنیا بھر کے مسیحی   Lent(ایام صوم) کے خاتمے  اور ابن مریم  علیہ السلام کی دنیا میں مبینہ واپسی پر عیدِ ایسٹر منارہے ہیں سری لنکا میں قیامت  ٹوٹ پڑی۔ دارالحکومت  کولمبو کے تین گرجا گھروں اور  Shangri-laسمیت تین پرتعیش    جدید ہوٹلوں میں  ایک کے بعد  ایک  6بم دھماکوں  نے207  بے گناہوں کا خون کردیا۔ بم حملوں میں  450 سے زیادہ افراد  زخمی ہوئے۔ متاثرین  میں مقامی لوگوں کے علاوہ امریکی، جاپانی ,ولندیزی ، برطانوی اور پرتگالی سیاح و مسیحی زائرین شامل ہیں۔ ہوٹلوں اور گرجاگھروں پر چھ بم دھماکے صبح پونے نوبجے ایک ساتھ ہوئے جسکے ایک گھنٹے بعد کولمبو کے مضافات کے دوگھرخودکش بم دھماکوں سے اڑادئے گئے۔ پولیس کا خیال ہے کہ یہ گھر بم کی تیاری اور منصوبہ بندی کیلئے استعمال ہوئے تھے اور انھیں شواہد مٹانے  کیلئے زمیں بوس کیا گیا۔

گزشتہ صدی کے اختتام پر سری لنکا بدترین  خانہ جنگی اور خونریزی کا شکار رہا ہے۔ 2009 تک   جاری رہنے والی   اس26 سالہ خانہ جنگی و  دہشت گردی  میں لاکھوں لوگ مارے گئے تھے۔ سری لنکا حکام کا خیال ہے کہ تامل دہشت گردوں کو ہندوستان کی پشت پناہی حاصل تھی۔

بحر ہند کے 65ہزار 330مربع میل  بڑے جزیرے  پر مشتمل اس ملک کی کل آبادی  2 کروڑ 17 لاکھ کے قریب ہے۔ یہاں بدھوں کا تناسب  70 فیصد ہے۔ سری لنکا میں 12.6 فیصد ہندو،  9.7فیصد مسلمان اور 7.6فیصد مسیحی آبادہیں۔انگریز بہادر کے دور میں سری لنکا کو سیلون کہا جاتا تھا جو اپنی خوش ذائقہ چائے کیلئے مشہور تھا۔

 مسیحی آبادی کو انتہا پسند بودھوں ی طرف سے برابر دھمکیاں مل رہی تھیں۔ National Christian Evangelical Alliance of Sri Lankaکے مطابق  صرف اس سال  یہاں مسیحیوں کو ہراساں کرنے ،  قتل کی دھمکیوں ، تشدد اور بدسلوکی کے 45 واقعات  ریکارڈ کئے گئے اور ان تمام واردات میں انتہا پسند سنہالی بودھ ملوث ہیں۔

اب تک اس وحشیانہ واقعہ کی کسی نے ذمہ داری قبول   نہیں کی